ధోనీ.. మళ్లీ వరల్డ్ కప్ తో వెళతావు!

ధోనీ.. మళ్లీ వరల్డ్ కప్ తో వెళతావు!


 ‘నీ కూతురు అదృష్టాన్ని తెస్తుంది. మళ్లీ ప్రపంచకప్‌తో తిరిగి వెళతావు’... భారత జట్టు ప్రాక్టీస్ సందర్భంగా ధోనికి ఓ అభిమాని చెప్పిన విషెస్ ఇవి. అది కూడా పాకిస్తాన్ వీరాభిమాని చెప్పిన మాటలు. వివరాల్లోకి వెళితే... బషీర్ అనే పాకిస్తాన్ వీరాభిమాని ఉన్నాడు. భారత్, పాక్ మ్యాచ్ ఎక్కడ జరిగినా రెండు దేశాల జెండాలతో హాజరవుతాడు. అడిలైడ్‌లోనూ భారత్, పాక్ మ్యాచ్ చూశాడు. పాక్ జట్టు ఆట చూసి విరక్తి పుట్టిందేమో... భారత జట్టు వెంట తిరుగుతున్నాడు. కారణం... ధోనికి తను వీరాభిమాని.

 

 గత ఏడాది టి20 ప్రపంచకప్ ఫైనల్‌కు ధోనియే బషీర్‌కు టిక్కెట్ ఇచ్చాడు. భారత జట్టు ప్రాక్టీస్ సెషన్ దగ్గరకు వచ్చిన బషీర్... తన టీ షర్ట్‌పై ‘ధోని ఐ లవ్ యూ’ అని రాసుకున్నాడు. బషీర్‌ను గుర్తుపట్టిన ధోని తనని చిరునవ్వుతో పలకరించాడు. అంతే కాదు... బషీర్ టీ షర్ట్‌పై సంతకం చేశాడు. ఈ సందర్భంగా ‘నీ కూతురు అదృష్టాన్ని తెస్తుంది...’ అంటూ బషీర్ చెప్పగానే ధోని ముసిముసినవ్వులు నవ్వుతూ వెళ్లాడు. బషీర్‌కు రోహిత్ శర్మ తన కళ్లద్దాలను బహుమతిగా ఇవ్వడం కొసమెరుపు. అమెరికాలో రెస్టారెంట్ నడుపుకునే ఈ పాకిస్తాన్ జాతీయుడి  అత్తగారి ఊరు మన హైదరాబాదే.

 

Read latest News and Telugu News | Follow us on FaceBook, Twitter, Telegram



 

Read also in:
Back to Top