ఫెడరర్ x వావ్రింకా

మోంటెకార్లో: స్విట్జర్లాండ్ స్టార్ క్రీడాకారులు రోజర్ ఫెడరర్, స్టానిస్లాస్ వావ్రింకా  ఈ సీజన్‌లో తమ నిలకడైన ప్రదర్శన కొనసాగిస్తూ మోంటెకార్లో మాస్టర్స్ సిరీస్ టోర్నీలో టైటిల్ పోరుకు సిద్ధమయ్యారు. శనివారం జరిగిన పురుషుల సింగిల్స్ సెమీఫైనల్స్‌లో ఫెడరర్ 7-5, 6-2తో డిఫెండింగ్ చాంపియన్, రెండో సీడ్ జొకోవిచ్ (సెర్బియా)ను ఓడించగా... వావ్రింకా 6-1, 7-6 (7/3)తో డేవిడ్ ఫెరర్ (స్పెయిన్)పై గెలిచాడు. క్వార్టర్స్‌లో టాప్ సీడ్ నాదల్‌ను ఓడించిన ఫెరర్ అదే జోరును కనబర్చలేకపోయాడు. వావ్రింకాతో ముఖాముఖి రికార్డులో ఫెడరర్ 13-1తో ఆధిక్యంలో ఉన్నాడు.

 

 గతంలో మూడుసార్లు ఈ టోర్నీలో ఫైనల్‌కు చేరుకున్న ఫెడరర్ మూడుసార్లూ రన్నరప్ ట్రోఫీతో సరిపెట్టుకున్నాడు. ఫెడరర్ నెగ్గితే కెరీర్‌లో 79వ టైటిల్‌తో అత్యధిక టైటిల్స్ నెగ్గిన వారి జాబితాలో మూడో స్థానానికి చేరుకుంటాడు. వావ్రింకా గెలిస్తే అతని కెరీర్‌లో తొలి మాస్టర్స్ సిరీస్ టైటిల్ అవుతుంది.