ధోనినే వద్దన్నాడా?

ముంబై:ఇండియన్ ప్రీమియర్ లీగ్(ఐపీఎల్)-10 వేలానికి ఒక రోజు ముందు రైజింగ్ పుణె సూపర్ జెయింట్స్ కెప్టెన్ గా మహేంద్ర సింగ్ ధోని  తప్పించడంపై రకరకాలు ఊహాగానాలు వినిపిస్తున్నాయి. ఒకవైపు ధోనిపై పుణె ఫ్రాంచైజీ వేటు వేసిందనే వార్తలు బలంగా వినిపిస్తుండగా, అందులో ఎంతమాత్రం వాస్తవం లేదని  ఆ యాజమాన్యం వర్గాల ద్వారా తెలుస్తోంది. టీమిండియా పరిమిత ఓవర్ల కెప్టెన్సీ నుంచి ఇప్పటికే తప్పుకున్న నేపథ్యంలో ఐపీఎల్లో కూడా ఆ బాధ్యతను చేపట్టలేనని ధోని చెప్పినట్లు సమాచారం. దీనిలో భాగంగా ధోనిని ఆటగాడిగా మాత్రమే కొనసాగించేందుకు నిర్ణయించినట్లు తెలుస్తోంది.. ఆ క్రమంలోనే స్టీవ్ స్మిత్ ఎంపికకు మొగ్గు చూపినట్లు సదరు ఫ్రాంచైజీ సీనియర్ అధికారులు తెలియజేస్తున్నారు. 'ఆ నిర్ణయం మాది కాదు.. ధోనిదే. ఆ నిర్ణయం తీసుకున్న తరువాతే ధోని మా  వద్దకు వచ్చాడు. తాను కెప్టెన్ గా చేయలేనని చెప్పాడు'అని ఫ్రాంచైజీకి చెందిన సీనియర్ అధికారి ఒకరు తెలిపారు.





గతేడాది ధోని నేతృత్వంలో పుణె సూపర్ జెయింట్స్ పేలవమైన ఆట తీరుతో టాప్-4లో స్థానం సంపాదించలేకపోయింది. గత ఐపీఎల్లో గుజరాత్ లయన్స్ జట్టుతో పాటు, పుణె సూపర్ జెయింట్స్ లు అరంగేట్రం చేసిన సంగతి తెలిసిందే. ఆ సీజన్ లీగ్ దశలో గుజరాత్ టాప్ లో నిలిస్తే, పుణె చివరి నుంచి రెండో స్థానంలో నిలిచింది.ఐపీఎల్-9 సీజన్ లో 14 మ్యాచ్లాడిన పుణె.. కేవలం ఐదు విజయాల్ని మాత్రమే నమోదు చేసి యాజమాన్యం పెట్టుకున్న ఆశలను వమ్ము చేసింది. ఈ క్రమంలోనే  ఏడో స్థానానికి పరిమితమైంది పుణె.  మరొకవైపు ధోని కూడా పెద్దగా ఆకట్టుకోలేదు. 12 ఇన్నింగ్స్ ల్లో ఒక హాఫ్ సెంచరీ సాధించి 284 పరుగులు సాధించాడు. మరొకవైపు పుణె  కొత్త కెప్టెన్ గా నియమించబడ్డ స్టీవ్ స్మిత్ గతేడాది ఆ జట్టు తరపున భారీ ఇన్నింగ్స్ లు ఏమీ ఆడలేదు. స్టీవ్ స్మిత్ 7 ఇన్నింగ్స్ ల్లో ఆడి ఒక సెంచరీ సాయంతో 270 పరుగులు చేశాడు. ఇదిలా ఉంచితే సవాళ్లను స్వాగతించే ధోని నిజంగానే కెప్టెన్సీ వద్దన్నాడా?లేక పొగబెట్టి అతన్ని తొలగించారా?అనే దానిపై అతను పెదవి విప్పితేగానీ తెలియదు.