మరో లవ్ జీహాద్ కేసు!!

లవ్ జీహాద్.. ఇప్పుడీ పదం చాలామంది నోళ్లలో నానుతోంది. తారా సచ్దేవ్ సంఘటన తర్వాత దీని గురించి అందరికీ తెలిసింది. ఈసారి జార్ఖండ్ రాష్ట్రంలోని ఛాత్రా జిల్లాలో ఈ తరహా సంఘటన జరిగింది. తానెవరన్న విషయం చెప్పకుండా ఓ యువకుడు వేరే వర్గానికి చెందిన యువతిని మోసగించాడు. ఎనిమిది నెలల గర్భవతి అయిన ఆమెతో గతవారం ఆ కుర్రాడు పారిపోయాడు. దాంతో ఆమె తండ్రి పోలీసులకు ఫిర్యాదు చేశారు. బాలికకు న్యాయం చేయాలని, ఇది మరో లవ్ జీహాద్ కేసేనని బీజేపీ, వీహెచ్పీ కార్యకర్తలు మండిపడ్డారు.



బాలిక తండ్రి తమ కుమార్తె కిడ్నాప్ అయినట్లు ఫిర్యాదు చేశారని, దాంతో ఆ యువకుడిని అరెస్టు చేసి జైలుకు పంపామని ఛాత్రా ఎస్పీ ప్రశాంతకుమార్ కర్ణ్ తెలిపారు. అతడు తనపేరు సోనుకుమార్ అని అతడు చెప్పుకొన్నాడని, నుదుటన బొట్టు కూడా పెట్టుకునేవాడని, ఓ ప్రైవేటు బస్సులో కండక్టర్గా పనిచేస్తూ ప్రతిరోజూ ఆమె కాలేజీకి వెళ్లేటప్పుడు వెంటపడేవాడని వీహెచ్పీ నాయకుడు విజయ్ పాండే తెలిపారు. ఇది చాలా సున్నితమైన అంశం కావడంతో సమగ్ర దర్యాప్తు జరిపించాలని కోరారు.