టీడీపీతో పొత్తుపై రంగంలోకి దిగిన వెంకయ్య

టీడీపీతో పొత్తు వ్యవహరం బీజేపీకి పెద్ద తలనొప్పిగా తయారైంది. ఈ నేపథ్యంలో సాధ్యమైనంత త్వరగా పొత్తులపై చర్చలు ఓ కొలిక్కి తీసుకువచ్చేందుకు బీజేపీ అగ్రనాయకత్వం నడుంబిగించింది. అందులోభాగంగా సీనియర్ నేత ఎం. వెంకయ్యనాయుడిని రంగంలోకి దింపింది. అలాగే సీమాంధ్ర ప్రాంతం బీజేపీ అధ్యక్షుడు కె.హరిబాబుతోపాటు వీర్రాజులు ఇప్పటికే హైదరాబాద్ చేరుకున్నారు. వారితో వెంకయ్యనాయుడు చర్చించి.. మరికాసేపట్లో టీడీపీ పొత్తుపై బీజేపీ ఓ అధికారిక ప్రకటన చేసే అవకాశం ఉంది.

అయితే బీజేపీ, టీడీపీల పొత్తుపై ఆ రెండు పార్టీలు ఓ అవగాహనకు వచ్చి. అటు తెలంగాణ, ఇటు సీమాంధ్రలో సీట్లు సర్దుబాటు కూడా చేసుకున్నాయి. అయితే బీజేపీ... ఎన్నికల బరిలో నిలిపిన అభ్యర్థుల విషయంలో చంద్రబాబు జోక్యం చేసుకుంటున్నారు. ఈ నేపథ్యంలో బీజేపీ అగ్ర నాయకత్వం చంద్రబాబుపై చాలా గుర్రుగా ఉంది. అందులోభాగంగా బీజేపీ సీనియర్ నేత ప్రకాశ్ జావదేకర్ గురువారం హైదరాబాద్ చేరుకుని... చంద్రబాబు వైఖరిపై తీవ్ర విమర్శలు చేసిన సంగతి తెలిసిందే.