నోటిఫికేషన్ల క్లియరెన్స్‌కు టాస్క్‌ఫోర్స్‌ కమిటీలు

సాక్షి, హైదరాబాద్‌: నోటిఫికేషన్ల క్లియరెన్స్‌కు నాలుగు టాస్క్‌ఫోర్స్‌ కమిటీలను టీఎస్‌పీఎస్సీ ఏర్పాటు చేసింది. పోస్టుల భర్తీకి నోటిఫికేషన్లు జారీ చేయకుండా అడ్డంకిగా ఉన్న సమస్యలను త్వరితగతిన పరిష్కరించాలని నిర్ణయించింది. వివిధ పోస్టులకు సంబంధించి శాఖల నుంచి రావాల్సిన వివరణలు, ఇండెంట్లు, రూల్‌ ఆఫ్‌ రిజర్వేషన్‌పై విఠల్, విద్యాసాగర్‌లతో కూడిన కమిటీ మంగళవారం సమావేశమైంది. ఆయా వివరణలు తెప్పించుకునేందుకు ఈ నెల 27 నుంచి 31 వరకు ఆయా శాఖాధిపతులతో సమావేశం కావాలని నిర్ణయించింది. పెండింగ్‌ పోస్టులపై వివరణలివ్వాలని ఆయా శాఖలకు టీఎస్‌పీఎస్సీ ఇప్పటికే లేఖలు రాసింది. షెడ్యూలు ప్రకారం ఆయా విభాగాధిపతులు వివరణలతో హాజరు కావాలని కమిషన్‌ సూచించింది.