ప్రభుత్వం నిర్లక్ష్యం వల్లే ఎంసెట్ లీక్: కోదండరాం

హైదరాబాద్: ప్రభుత్వం నిర్లక్ష్యం వల్లే తెలంగాణ ఎంసెట్-2 ప్రశ్నాపత్రం లీకైందని టీజేఏసీ చైర్మన్ కోదండరాం విమర్శించారు. 'నీట్'పై ముందే నిర్ణయానికి వచ్చివుంటే విద్యార్థులు రెండు పరీక్షలు రాయాల్సిన అవసరం వచ్చేది కాదని అభిప్రాయపడ్డారు.



శుక్రవారం ఆయన విలేకరులతో మాట్లాడుతూ... ఎంసెట్-2 లీకేజీ వ్యవహారంపై సీబీఐ దర్యాప్తు జరిపించాలని డిమాండ్ చేశారు. కన్వీనర్ ను సస్పెండ్ చేయాలని, మంత్రులు కూడా బాధ్యత వహించాలని అన్నారు. కోర్టు నిర్ణయం వచ్చే వరకు ఆగివుంటే వైస్ ఛాన్సలర్ల నియామకంలో టీఆర్ఎస్ ప్రభుత్వానికి అప్రతిష్ట వచ్చేదికాదని పేర్కొన్నారు.