సంఖ్య తేలింది... ఇక సమరమే

 విజయనగరం కంటోన్మెంట్, న్యూస్‌లైన్: సార్వత్రిక ఎన్నికల బరిలో నిలిచిన వారి సంఖ్య తేలిపోయింది. నామినేషన్ ఉపసంహరణకు ఇచ్చిన రెండు రోజుల (మంగళ,బుధ వారాలు) గడువులో మొత్తం 18 నామినేషన్లు ఉపసంహరించుకున్నారు. తొమ్మిది అసెంబ్లీ స్థానాలకు 77 మంది, ఒక లోక్‌సభ స్థానానికి తొమ్మిది మంది కలిపి మొత్తం 86 మంది బరిలో నిలిచారు. ఈ నెల 12 నుంచి వివిధ రాజకీయ పార్టీల నేతలు అసెంబ్లీ స్థానాలకు 114 నామినేషన్లు దాఖలు చేశారు.  21న నామినేషన్ల  పరిశీలన చేపట్టగా 20 నామినేషన్లు తిరస్కరణకు గురయ్యాయి.కాగా 22, 23 తేదీల్లో నామినేషన్ల ఉపసంహరణ కార్యక్రమం సందర్భంగా 18 నామినేషన్లు ఉపసంహరించుకున్నారు. దీంతో 9 అసెంబ్లీ స్థానాల్లో 77 మంది అభ్యర్థులు బరిలో ఉన్నట్టు లెక్క తేలింది.  జిల్లాలోని ఒక్క పార్లమెంటు స్థానానికి 11 నామినేషన్లు దాఖలు కాగా,  పరిశీలనానంతరం పది నామినేషన్లు అర్హత పొందాయి. ఒక నామినేషన్ ఉపసంహరించుకోగా తొమ్మిది మంది అభ్యర్థులు బరిలో ఉన్నారని రిటర్నింగ్ అధికారి కాంతిలాల్ దండే తెలిపారు.