కేజ్రీవాల్‌కు దెబ్బలు.. పార్టీకి డబ్బులు!

న్యూఢిల్లీ: చెంపదెబ్బలు.. ఇంకు చల్లడాలు.. టమాటాలు, కోడిగుడ్లు విసరడాలు.. ఇవన్నీ రాజకీయ నాయకులను భయపెట్టేవే! ఇబ్బంది సృష్టించేవే! కానీ, ఆమ్‌ఆద్మీ పార్టీకి మాత్రం అవి బాగా కలిసొస్తున్నాయి.. ఆ పార్టీ చీఫ్ అరవింద్ కేజ్రీవాల్‌పై దాడులు జరిగినప్పుడల్లా కోట్ల కొద్దీ విరాళాలు వస్తున్నాయి. కొద్దిరోజులుగా జరిగిన ఘటనలను గమనిస్తే.. ఇదే ప్రస్ఫుటమవుతోంది. ఈ నెల 4న దక్షిణ ఢిల్లీలో కేజ్రీవాల్‌ను ఓ వ్యక్తి చెంపదెబ్బ కొట్టిన విషయం తెలిసిందే.

 

 

 ఆ రోజు ఆప్‌కు ఏకంగా రూ.1.35 కోట్ల విరాళాలు వచ్చాయి. అంతకు ముందు రోజు వచ్చిం ది రూ.30 లక్షలే! ఆటో డ్రైవర్ కేజ్రీవాల్‌ను చెంపదెబ్బ కొట్టిన ఈ నెల 8న రూ. 85 లక్షలు.. గత నెల 25న వారణాసిలో కేజ్రీవాల్‌పై దాడి జరిగిన రోజున రూ.49 లక్షల విరాళాలు సమకూరాయి. ఇవన్నీ కూడా అంతకుముందు రోజుల్లో అతి తక్కువ విరాళాలు వచ్చి.. ఒక్కసారిగా పెరిగిపోయినవే కావడం గమనార్హం.