ప్రభుత్వ వైద్య కళాశాల ఏర్పాటు చేయాల్సిందే..

విజయనగరం పూల్‌బాగ్ : జిల్లా కేంద్రంలో ప్రభుత్వ వైద్య కళాశాలను ఏర్పాటు చేయాలని సీపీఎం జిల్లా కార్యదర్శివర్గ సభ్యుడు రెడ్డి శంకరరావు డిమాండ్ చేశారు.సీపీఎం పది రోజుల పాటు నిర్వహించిన పాదయాత్రలో గుర్తించిన ప్రజా సమస్యలను పరిష్కరించాలని కోరుతూ బుధవారం చలో కలెక్టరేట్ కార్యక్రమం నిర్వహించారు. అనంతరం కలెక్టరేట్ వద్ద ధర్నా చేపట్టారు. పాదయాత్రలో సుమారు 154కు పైగా సమస్యలను గుర్తించామని, వాటన్నింటినీ పరిష్కరించాలని కలెక్ట ర్‌ను కోరారు. ఈ సందర్భంగా శంకరరావు మాట్లాడుతూ.. జిల్లాలో పేద ప్రజల వైద్య అవసరాలు తీర్చే కేంద్రాస్పత్రిని ప్రైవేట్ వ్యక్తులకు అప్పగించేందుకు చూడటం తగదన్నారు. జిల్లాలో ప్రభుత్వ మెడికల్ కాలేజీని ఏర్పాటు చేయాలని డిమాండ్ చేశారు.